Gründtlicher Bericht, ob Zauberey die argste vnd grewlichste sünd auff Erden sey

Das V I I I. Capitel.
Die Zauberer vnd Zauberinnen seynd ärger als einige Ketzer vnd Sectarien.

DIe Ketzer vnnd Sectarien seynd wol sunst respectiuè die Gottloseste vnnd schädlichste Sünder vnder den Christen: Dann sie verkeren vnd verfelschen das fundament der frombkeit vnd seligkeit, den Glauben, nemblich: aber gleichwol feind die zauberer vnd zauberinnen noch vil ärger vnnd gottloser als einige Ketzer:

1. Dann die Ketzer vnd Sectarien, die weichen wol vom Catholischen glauben in etlichen,

[p. 17]

aber formaliter, nicht in allen puncten, ab:

Die Zauberer vnd Hexen fallen dem Catholischen glauben samen vnd zumal ab.

2. Die Ketzer vnd Sectarien die wöllen noch in Gott vnd in Christum glauben, gehen Gott nicht ex professo zu samen ab, sonder loben noch zum wenigsten auff ire weisz, ehren vnd preisen Gott vnd vnsern Erlöser Christum Jesum.

Die Zauberer vnd Zauberinnen die schmehen lästern vnd verleugnen Gott vnd Christum im grund, vnd fallen im gentzlich ab, vnd welen den Teufel für iren Gott.

3. Die Ketzer vnd Sectarien ob wol sie durch den lügengeist verblendet sein vnd getriben werden, so betten sie doch den teuffel sichtbarlich vnd auffsetzlich nicht an, sondern wöllen noch des teuffels feind geacht vnd gehalten seyn.

Die Zauberer vnd Zauberinnen die gehen mit dem teuffel sichtparlich vmb, ehren vnd beten in sichtparlich vnd persönlich an, thun alles in seinem Namen wissentlich vnd vorsetzlich.

4. Wiewol die Ketzer vnd Sectarien mit dem teuffel geistlich bulieren, in den sie seiner falschen lehr vnd eingebung statt geben, damit iren willen vnd verkehrte lust treiben, wider den willen vnd meinung Gottes: so wissen sie doch solches nicht, den mehrertheil, oder wöllens nich wissen: falschlich meinent, das sie dem rechten wort vnd geist Gottes folgen: vnd treiben gleich wol kein offentliche, vnd sichtparliche, oder personliche vnkeuschheit mit dem leidigen teuffel:

[p. 18]

Die zauberer vnd zauberinnen, die wissen das sie mit dem teuffel vmbgehn, vnd bulieren mit demselbigen wissentlich, sichtparlich vnnd persönlich in solcher sichtparlicher menschlicher gestalt, die der teuffel ausz der lufft angenommen, vnd darmit (der sunst ein geist, vnd von naturn, menschlichen sterblichen augen vnsichtpar ist, vnnd keinen waren leib hat) sichtparlich erscheinet.

5. Wiewol auch die Ketzer vnd Sectarien, durch anstifftung vnd treibung des Hellischen feinds vnd lugengeists, one vnderlasz, ir Ketzergifft ausz zubreiten, vnd andere an sich zu ziehen, vnd iren Ketzerhauffen zuuermehren auffs fleissigst befleissen. So ziehen sie doch die menschen nit gantz vnd gar von Gott, vnd dem glauben ab, irer meinung nach, sonder sie wöllen die leuth (wie sie fälschlich vom lugengeist vberredet) erst recht zu Gott vnd dem waren glauben in Christum bringen: da sie dieselb doch von Gott vnd dem rechten glauben abwenden vnd verfüren:

Die zauberer vnd zauberinnen aber, die seynd drauff ausz, vnd werden auch durch den teuffel irem bund nach, darzu getriben, das sie andere, wa sie immer können ex professo vnd fürsetzlich von Gott vnd seim wort vom rechten glauben, zum teuffel selbst, vnd iren teuffelischen wesen, erschröcklicher abgötterey vnd zauberkünsten bewegen vnd bringen, zu trutz vnd verachtung Gottes, vnd zu sterckung vnd vermehrung des teuffels reich, vnd gewisser verdamnusz aller deren die inen glauben vnd folgen. Vnd zu dem allem bezaubern sie auch die menschen nit allein, wie auch die Ketzer thun,

[p. 19]

am verstandt vnd an der seelen, da sie können: sondern auch an leib vnd gut, vnd was sie angeht, daruon sie sonst leben müssen.

Ja es seyn die zauberer vnd zauberinnen selbst ⁺ Ketzer: ja wol die allerärgeste, schendlichste vnd grewlichste Ketzer: dieweil sie zwar getaufft vnd Christen gewesen, aber dem glauben, da nit alle in allen vnd jeden, doch in den principalen vnd fürnembsten puncten abgefallen, vnd iren eigen vnd falschen glauben gefaszt haben, Gott, sein wort, vnd Sacramenten, Gottes freund vnd heiligen, beuorab die hochheiligste Mutter Gottes, schenden vnd lästern in iren hertzen, vnd conuenticulis, den teuffel an statt, vnd für iren Gott halten vnd glauben, &c. vnd seyn also ärger, gottloser vnd schedlicher als einige Ketzer in der welt sein können.

+ Vide Bensfeldium de Confessionibus maleficiorum praeludio 14. pag. 127. & 257. vlt. editionis. Vbi probat: male ficas etiam haereticas & plusquam haereticas esse.