Diarium van Egbert Alting 1553-1594

Wondsdach 28 Novembris 1576.

Alsoe de poorten ommeheer gesloten ende nu omtrent middage 2 uhren geopent, sint van de Geswoerne Meente 2 ende 1 uuthen Raedt verordnet, om upsicht up de in- ende bijsunders de uuthgaende personen thebbende, den welcken seker ordinantie ter handen gestelt, sich daerna tho richtende. Des musten de uuthgaende personen erst een cedell up hoer persoen ende goet in der stadt cijskamer laten teeckenen, dat iider doer de venster upter straten, vermidts de grote dranck van volcke, behandiget worde.

Hiirna volght de ordinantie, soe den commissarien voergen. gegeven belangende de uuthgaende personen ende goeder, so elck bij sich mucht hebben. Dincomenden angaende soll staen, woe besheer voerhen gebruecklick.

Ordinantie voer den heeren commissarien voer der poorten.

Dat voereerst niemandt uuth der stadt sunder paspoirt, in der cijsskamer geteeckent ende versegeldt, sall gelaten worden.

[p. 346]

Dat die commissarien voer der poorten ghoede kunde sullen hebben van de personen, die uuth der stadt ghaen. Offte zullen de onkundige personen neffens hoer brengen eenen ghoeden bekanden vertruweten borger, die voer den onkundigen uuthgaende personen sullen loven tstaende.

Dat die uuthpassierende personen sullen elck bij hoeren eedt verclaeren, dat sie anders neet met sich uuthbrengen dan in der voersz. verzegelde cijssteken beschreven staet ende sullen bijsunders verclaeren, offte se oeck eenige breeven bij offte onder sick hebben edder neet. Des salt nochtans staen tot erkentenisse ende ghoede discretie van den voersz. commissarien, offte se zodane personen ende ghoederen, woe voergen. willen laten passieren edder neet.

Ende want mede van onbekande vagabunden ende bedelaers commotie, brandt ende ander quaet to besorgen, is navolgende verbott concipieert dan neet to warcke stelt, vermidts de poorten gesloten off weynich geoepent:

B. ende R. laten weeten ende gebieden, dat alle starcke bedelaers, vagabunden ende onnutte ledichgangers, soe binnen een maent harwerts in deser stadt gekomen, sich sullen binnen deser sonnenschijn weder uuth der stadt vertrecken ende sich neet langer daerin noch in der stadt iurisdictie ende gebiede entholden offt vinden laten, allent bij straffe an den lijve na der saecken gestalt ende gelegentheyt.

Den rottmesteren an tho seggende:

Dat se sullen bestellen, dat men in elck rott 4 luchten mit een barnende keertze van ses uhren tsavonts tot ses uhren smorgents van de benedenste boene na der straten uuthangen sall. Ende zall de rottmester oeck de 4 huysen ordinieren, daer de voersz. luchten alle nachten sullen uuthangen. Daer alsdan de inwoener des huyses tsavonts tho ses uhren ende oeck umb 12 uhren tho middernacht een geheele keertse tijdtlicx sall laten insetten. Des sullen de keertzen soe groot ende lanck wesen, dat elcke keertze over ses uhren barnen kan. Welcker keertzen de rottmester bestellen ende dat geheele rott bekostigen zall, zoeals de rottmester dat elck na gelegentheyt ende behoer ordineeren ende anseggen sall. Beholdtlyck, dat de 4 huysen voergen. sullen van de onkosten der keertsen gevrijet zijn, doch tot discretie der rottmesteren voergen. Allent bij een marck to broecke.

Nota, dat men boven dit iider huys laten anseggen nacht ende dach een groot vat waters voer der doere veerdich to holden.

Updat oeck geen rumoer offt twijdracht durch brandtsnoot, so elck man sunder onderscheet daerna wolde lopen, entstaen muchte, hefft men den 4 hoornwachters starcke, harde mannen tot 30, 40 tho doen bestellen, de alle nachten voer de raedtkamer solden wacht ende veerdich sijn, als volget^a):

a) Voor deze ordonnantie is in het dagboek een bladzijde open gelaten.