Saterdach 7 Novembris 1579.
Nadat de hoefftmannen de vorsz. acte gepasseert, hefft oeck sijn Gen. dese ondergescreven oer weder behandet:
Alsoe wij Georg van Lalaing.......... int restitueren der train van justicie binnen der stadt ende Omlanden van Groeningen goet bevonden hebben, dat den olden secretarisen ende dienaren bij provisie noch int exerceren van hun officie gesuspendeert sullen blijven, soe ist nochtans, dat wij geneight sijnde, om een yegelyck recht ende justicie tadministreren, midts desen verclaren, dat wij binnen den tijdt van dre maenden nae datum deses behoerlyeken informatien sullen doen nhemen up den excessen, die men praetendeert bij hemluyden (geduerende hun officien) respectivelick gepleget te sijn ende daernaer in alder ijll nae gelegentheit der saecken eyndtlycken up hun restitutie ofte privatie diffenieren. Verclaren voerts, dat bij so verre de voersz. informatien binnen den vorsz. dre maenden neet genomen ende werden, tevreden te zijn, dat zijluyden ende elck van hun bij believe van de stadtholder ende hooftmannen wederomme int exerceren van hun officien gerestitueert werden. Ende sullen voertaen alle jaeren als nyeuwe hofftmannen in hun officie treden, den secretarys ende dieneren hun officie in des stadtholders ende hoeftmannen handen overgheven ende sal tot hun discretie ende goetduncken staen, deselve wederomme aen te nemen oft andere in hun plaetzen te stellen. Eyntelicken so beloven wij allen abusen der justicie in den Ommelanden oeck mede te doen corrigeren ende beteren, gelijck wij in der stadt up Con. Mats. kamer van justicie besich ende bekommert zijn te doen.
Actum Essen den 7 Novembris 1579.
Auteursrechtelijk beschermd