Diarium van Egbert Alting 1553-1594

Dinxsdach 10 Novembris 1579.

Heft ons sijn Gen. desen adviis van versekeringe voer de comparanten upter Hoeftmannenkamer ter handen gestelt, woe volght:

Also wij wal geneight ende geresolveert sijn, de justicie haeren voertganck te laten gewinnen op al sulcke condicien, als tusschen ons den hooftmannen geraempt ende gesloten sijn, soe eist nochtans, dat de van de Omlanden versoucken ende begeren alsulcke verseeckertheit, als naer redene behoiren sall, soewel voer de dagelixsche comparanten voer den hooftluyden als allen anderen, die up gemene landt- ende warffdagen sullen moeten compareren, gemerckt dat die hoochste justicie op de warffdagen (de veer offte meer malen jaers geholden moeten worden) consisteert ende de regeringe der stadt ende landen sonder gemene landtdagen oeck neet behoerlick en moegen geadministreert worden. Ende wij daer beneffens considererende, dat, naer dat tractaet tot Winssum gemackt, evenwell int leste van vergangen Augusto alsulcke oproer ende commotie in der stadt Groeningen gewest, dat de magistraet selffs nyet allene neet seker, maer oeck in uterste lijffs-

[p. 477]

gevaer gewest is ende derhalven anderen, die noch mitter stadt in questie staen, vele weyniger verseeckert geholden connen worden, hebben wij goet gevonden, tot vorder versekertheit van beyde partijen die van der stadt dese naervolgende middelen te proponeren.

Erstlick dat de van Groeningen volgende het tractaet tot Winsum, den 11 Junii gemaeckt, sullen scryfftlycke versekeringe gheven voir allen denghenen, die aldaer voer den hoofftmannen compareren sullen, dat deselve vrij onbelettet huerer personen ende ghoederen sullen moegen in ende uuther stadt Groeningen tot hueren believe trecken onder alsulcke obligatie, als int tractaet breder vervatet is.

Belangende de naerder verseeckertheit voir den comparanten uyten Omlanden up gemene landt- ende werfdagen in Groeninge vinde wij geen drachgelycker middelen, als dat de van Groeningen genoechsaem ghijselers gheven soewel van de gereformeerde als catholique religie, de in eerlycke neutrale plaetzen bij ons in competenten getall sullen moegen gedenomineert ende bewaert worden tot alsulcken tijdt, als de gemelte gemene landt- ende warffdagen dueren sullen, ofte stellen totter stadt discretie, cuer oft optie, oft sij beter vinden, dat bij provisie sonder praejudicie van enige privilegien ofte enige andere gerechticheyden deselve gemene landt- ende warffdagen in den Ommelanden geholden ende van dien van den Omlanden voir de comparitie van Lieutenant ende Hooftmannen sampt denghenen, die van der stadt Groeningen aldaer compareren sullen tot verseeckertheit genoechsam ghijselers (als boven van der stadt verhaelt) in onsen handen stellen ende dat tselve oeck alsoe lange, als voergemelte gemene landtoft werffdagen dueren sullen, totter tijdt de saecken ende differenten tusschen Stadt ende Omlanden mit recht oft vrientschap sullen gescheyden sijn. Ende alle dit selve (als voiren verhaelt) sonder praejudicie offte verminderinge des boven gemelte tractaets, den 11 Junii tot Winsum opgericht.

Receptum den 10 Novembris 1579.

Is mede den heren hooftmannen voergeholden van up te staende, wes bij se tegens landtrecht soll moegen gerichtet worden etc.