Officia Ciceronis, leerende wat yeghelijck in allen staten behoort te doen, bescreuen int Latijn

VVat eerlijcke ledicheyt oft ruste eenen grootmoedigen man betaemt.
Het xxxv. Capit.

Men moet ooc achten dat de ghene, die tgemeen goet regeren, d'alder grootste ende heerlijckste saken handelen: aenghemerct huer handelinghe sich alderbreetste, ende tot de meeste menichte streckende is: daer zijn ooc veel heerlijcke mannen gheweest (somen ooc noch wel vint) in een stil gherustich leuen naesporende oft bedenckende groote saken, ende hielden hun binnen hare wooningen: oft verselschapt zijnde met Philosophen, oft met regenten van tgemeen goet, verlustichden si hun in haer huyslijcke saken: nochtans niet alsoo datse haer besittinghen oft haue seer benaerstichden te vermeerderen, oft dat si die hun aen ghinghen huer goet lieten ghebreck hebben, maer deylden dat henluyder schamele vrienden, iae oock tghemeen

[fol. 36v]

weluaert, alst de noot eyschte. En behoren onse goeden rechtelijcken vervvoruen te zijn, niet door schandelijck noch hatelijck ghevvinne: si moeten oock veel luyden (maer die dat vvaerdich zijn) te profijte ende te goede comen: dan machmen dat oock met redene, met naersticheyt ende met spaerlijcheyt vermeeren: ende dat lieuer in eerlike miltheyt ende vveldaet totten behoeftighen besteden, dan in vvellusten, oueruloet, ende ouerdadige pompe te misbruycken. Die dese dinghen vvel onderhout, mach heerlijck, treffentlijc, ende manlijck leuen, oock mede eenvuldelijck ende vriendelijck teghen alle menschen.