Officia Ciceronis, leerende wat yeghelijck in allen staten behoort te doen, bescreuen int Latijn

Vande verchieringhe der mannen ende der vrouwen, oock mede van tghelaet des lichaems.
Het li. Capit.

[fol. 51r]

Ende wantmen tweederley schoonheyden vint, waer af d'een lieflic ende gent is, d'ander eerwaerdich ende dapper: soo behooren wy het lieflijcke wijflijck, ende het eerwaerdighe manlijc te achten. ⁺Daeromme sal de man alle verchieringe die eenen man niet en betaemt schuwen ende oeck mede alle wijflick ghelaet in gaen, staen ende alle lijfs beroeringhe vermijden. Want de manieren vanden worstelaers zijn dicmaels hatelick: ende zijn sommighe beweghingen vanden batement speelders niet al vry van bueselinghen. De eerwaerdicheyt van de ghedaente salmen door eenen goede veruwe, ende de veruwe door lichamelike oeffeninghen onderhouden. Daer en bouen moetmen reynlick zijn, doch niet soo malsinnelick dattet spottelic is: maer datmen alleen de claddicheyt ende slordighe slofheyt veriaghe. Desgelijcx salmen inde cleedinge doen, waer inne (soot in alle saken is) middel te houden het alder beste is. Men moet ooc mijden dat de ganc niet al te lancsaem en sy: soo datmen niet (alsmen seyt) drie treden in een saucierken en terdt. Oock mede salmen inden haestigen ganghe niet al te snel ende rasch zijn: want hier door vercort den athem, taensicht verandert, ende de mont verdraeyt, daer wt men merct dat by sulcdanige geen gestadicheyt

+ Eerwaerdicheyt betaemt den mannen, lieflijcheyt den vrouwen

[fol. 51v]

en is. Maer aldermeest moetmen benaerstigen dat de beroeringen des herten niet vander naturen en wijcken: twelc wy wel doen sullen, indien wi ons voor verstoringen ende mismoedicheyt hoeden ende indien wy met ernstlijcke sinnen waken om niet te doen dan dat behoorlijc is. Maer dese beroeringen des ghemoets zijn tweederley: d'eene staet inde gedachten, d'ander inder begeerten. De gedachten zijn meest besich int nasporen ende ondersoecken vander waerheyt ende de begeerten porren om yet te doen. Aldus salmen naerstelijck arbeyden om de gedachten tot d'alderbeste dingen te ghebruycken: ende om de begheerten ghehoorsaem te maken onder de redene.