Declaratie van dese nauolghende Epistele.
ALs de Griecken metter macht na Troyen getrocken waren: om Helena Menelaus huysvrouwe, die Paris ontschaect hadde, weder te halene, thien iaren lanck laghen sy voor de stadt eer sy die machtich werden: daer Vlysses, de sonc van Laertes, vele vrome feyten ghewracht heeft: eens deels duer sijn eloquentie ende listighe practijcken, ende eens deels duer sijn cloeckeyt. De stadt ghewonnen sijnde, is hy met sijn schepen naer Griecken weder gheseylt, Maer onderwegen heeft hy alsulcke rampsalige auentuere ghecreghen, dat hy noch thien iaren op de reyse was eer hy thuys gheraken conde, diuersche eylanden duer quade fortune besoeckẽde. Dies Penelope zijn huysvrouwe seer mistroostich was, dat andere heeren thuys quamẽ, ende dat sy van haren man (die sy vierich bemin de) gheen bescheet en hoorde. Ende al was hy twintich iaren wt den lande, nochtans sy eerbaer ende suyuere haer altoos gehouwen heeft. Ten lesten schrijft sy desen brief (soo Ouidius ghefingeert heeft) daer inne te kennen geuende haeren druck, lijen, en verdriet, hakende seere naer sijn comste, &c.
Auteursrechtvrij