Logo DBNL
Den lust-hof der Christelycke leeringhe (1622)

Den lust-hof der Christelycke leeringhe

(1622)–Benedictus van Haeften–rechtenstatus Auteursrechtvrij

Vorige Volgende

Van het Avondt-Ghebedt.

 
Vra.
 
Wanneermen slapen gaet,
 
Wat moetmen hem ghewennen?
 
Ant.
 
1. Danckt Godt van sijn' weldaedt:
 
2. Bidt om u wel te kennen:
 
3. Peyst wat ghy hebt ghedaen,
 
Ghesproken en ghedacht:
 
4. Een goedt opset neemt aen,
 
Van sonden u voorts wacht:
 
5. Bidt om vergiffenis:
 
6. Beveelt oock voor dien nacht
 
In Godts bewaerenis',
 
V, en u heel' gheslacht.


illustratie

Het Avondt-ghebedt.

Op de wijse:
Gheeft my te drincken naer mijn' dorst.
Malheureux monde je vous ay.

 
ALmachtigh Heere Iesv goed,
 
V zy lof en danck toe-gheschreven, +
 
Die my van veel quaedts hebt behoedt,
 
En veel weldaden hebt ghegheven:
 
G hebt my tot noch bewaert in 'tleven;
 
Van u heb ick kost, kleer, en tijdt,
 
En al' mijn' nootdruft, Heer' verheven:
 
Dus weest altijdts ghebenedijdt.
 
 
 
Verlicht my, Godt, dat ick sien magh+
 
Hoe mijn' siel' is ghestelt van binnen:
 
Dickwils hebb' ick van desen dagh
 
My af-ghescheydt van uwer minnen;+
 
Ick heb' ghevolght mijn' eyghen sinnen;
 
Veel ydelheydts heb' ick ghedaen:
 
Maer nu wil ick, o Heer', beginnen
 
Te nemen een nieu leven aen.
 
 
 
Eylaes! ick heb' my seer ontgaen
 
In woorden, wercken, en ghedachten;
 
Seer flauw in uwen dienst ghestaen;
 
Op u, o Heer', ick weynigh achten;
 
Ick diend' u niet uyt al' mijn' krachten;
 
Ick dede quaedt, niet min noch meer,
 
Oft 'tOordeel niet waer' te verwachten:
 
Maer weest toch mijns ghenadigh, Heer'.
 
 
 
Het is my leet, dat ick soo seer
 
V heb vertoorent door mijn' sonden;+
 
Ick hoop' dat ick van nu niet meer
 
Sal werden in het quaed bevonden:
 
Dus bid' ick, door uw' roode wonden,
 
Wilt in ghenade my ontfaen';
 
Op dat ick reyn, en heel ontbonden,
 
Door-loopen magh der deughden baen.
 
 
 
+Bewaert my, Godt, in desen nacht
 
Van sonden, en van alle vlecken;
 
En van des boosen vyandts macht,
 
Die my soeckt in sijn net te trecken:
 
Met deughden wilt mijn' siel' bedecken.
 
Maria Maeght, komt my te baet;
 
O Enghel Godts, wilt my vroegh wecken,
 
Dat ick Godt diene vroegh en laet.
 
 
 
+Iesv, bewaert dit huys-ghesin,
 
Vader, en Moeder oock midts desen:
 
Dees' plaets', en die daer woonen in
 
Beschermt, o Iesv Godt ghepresen:
 
Mijns vrienden helper wilt oock wesen:
 
Mijn' broeders, susters van ghelijck,
 
En die my hebben goedt bewesen,
 
Gheeft al' te samen 'themelrijck. Amen.

Vorige Volgende