Horae Belgicae

CLXII.
¶ Een nyeu liedeken.

WJe wil hooren een goet nieu liet
En dat sal ic ons singhen
mer dat te wittenberch is geschiet
Van also vreemde dinghen
Daer ghingen twee gespeelken goet
So verre aen gheen groen heyde
die een die voerde eenen huebscen moet
die ander weende seere
Ghespele wel lieue ghespeelken goet
Waer om weende ghi so seere
Mer weent ghi om ws vaders goet
Oft weent ghi om v eere
Jc en ween niet om mijns vaders goet.
Jck en ween niet om mijn eere
Wi twee wi hebben eenen lantsknecht lief
Rijck god wie sal hem werden

[p. 243]

5.

Ghespele wel lieue ghespele goet

 

Laet mi den lantsknecht alleene

 

Jck sal v mijnen broeder gheuen

 

Mijns vaders goet een deele

6.

Och dijnen broeder en wil ic niet

 

Noch dijns vaders goet een deele

 

Jc hebbe veel lieuer mijn soete lief

 

Dan siluer oft root gulden

7.

En neme ick dan die rijcke

 

So truert die suyuerlijcke

 

die rijcke wil ic laten varen

 

Ende nemen die suyuerlijcke

8.

Een luttel goets is haest verteert

 

dan heeft die liefde een eynde

 

dan zijn wi twee noch ionc ende sterck

 

Meer goets mach ons ghewerden

9.

Hi nam dat maechdeken bider hant

 

Bi haer snee witte handen

 

Hi voerdese voor dat groene wout

 

dat groene wout ten eynde

10.

Daer vonden si twee een bedde

 

Van peerlen ende van siden

 

Adieu adieu mijn soete lief

 

Het gaet sich aen een scheyden

11.

Maer die dit liedeken eerstwerf sanck

 

Hi heuet wel ghesonghen

 

Hi heuet alle vroukens lief

 

God scheynde die verraders tonghen