Horae Belgicae

[p. 305]

CXCVIII.
¶ Een nyeu liedeken

JC wil gaen om mijn ghewin
En soecken hansken ende gille
Jck heb eenen man naer mijnen sin
Hi laet mi doen al dat ick wille
Als ict al besorghe op dit termijn
Dan segt hi. Een vrou van eeren suldi zijn
Jc loope rincketten aen elcken cant
En ic doe mijn keelken clincken
Jc gheue mijnen man eenen penninc in de hant.
daer me so gaet hi sitten drincken
Als ic ghelt thuys brenge cust hi mijn
dan segt hi. Een vrou.
Jck sitte heel nachten op die banck
Niet achtic op der lieder snaer
Jck hebbe eenen man naer mijnen danck
Hi draecht mi gans duer vier en water
Als ic hem hou gaende te bier te wijn
dan segt hi. Een vrou.
Al werdick beclapt men vinter meer
daer af en maect mijn man gheen voere
Hi kijft so ruytelic voor mijn eer
En segt mijn wijf en is geen hoere
Jck beloue hem een paer cousen fijn
dan segt hi Een vrou.
Hi laet mi nv mijn willeken doen
So langhe als icket al betale
Coop ic nyeu cousen oft trijpen scoeu
Hi en vraghet mi niet waer dat ict hale
Al doe ick al dit ten is hem gheen pijn
dan segt hi. Een vrou.
Al werdic ghebesicht wat lichter aen
Het en scaedt mi niet een boone
Jck come weder thuys tot mijnen man
En ick gheue hem een gouden croone

[p. 306]

 

Als ic hebbe ghehadt een goet ravijn

 

Dan segt hi. Een vrou van eeren suldi zijn

7.

Oorlof men vinter noch meer bekent

 

Van sulcken aerde in allen hoecken

 

Jn vlaendren, brabant, te brugh, te gent

 

die wel tconto orboren laten versoecken

 

En haer mans wel payen met cluchten fijn

 

En willen nochtans vrouwen van eeren sijn