Ghemeene seyndtbrieven

Dronckenschap salmen schouwen.

GVnstige seer beminde vrient, Godt die Heer laet u vvel varen. Den vvaeromme van mijn schrijven is, dat ick u vriendelyck vermane dat ghy dronckenschap wilt schouwen. Want het is een groote leelycke sonde, vvaer vvt veel quaet is comende by lanckheydt van tijden, Somen siet dat dronckaerts verdrincken haer verstandt en sinnen, en vercorten haer leven, cryghen loopende ooghen, bevende handen, een stinckende azem, een quaet lichaem, versuymen haer vverck, zy openbaren haer secreten, zy vvorden te lesten een kinder spot, ende een verdriet van alle menschen die met haer om gaen. Sulcx datse veran-

[fol. A4v]

deren, by naest inde natuere van een Vercken, dat altijdt gnort ende nummermeer versaet en is, maer crijghen van drincken dorst, ende vvorden soo dick en grof datse nauwelijcx gaen oft staen connen. Die dranck gaet vvel soet in, maer 'tverandert al in fenijn ende bitterheyt. Dus beminde, schout droncken drincken, En vveest sober ende nuchteren, en ghy sult u selven groot ghemack aen doen. Zijt hier mede den Haaer bevolen.