Ghemeene seyndtbrieven
(1597)–Heyman Jacobs–
Auteursrechtvrij
[Folio B5v]
| |
LIeve seer beminde soone H. Ick ontbiede u met u meester duysent goede nachten. Den vvaeromme van desen is dat ick niet alleen begeere dat ghy vvel sult leeren, Fransoys, Cyferen, rekenen, ende schryven, hoe vvel dat seer goet is. Maer principalijck begheer ick dat ghy u vvilt oeffenen in alle deuchden te vveten in vasten, in bidden, in aelmissen, in alle Godtvresentheydt, in ootmoedigheyt, in patientie, in ghehoorsaemheyt, inde liefde Gods, Oock in die drie Godlijcke deuchden, 'tgheloof die hope, die liefde. Voort int overdencken vande Passie ons Heeren Iesu Christi, ende oock die vier uytersten, te weten den sterfdach, het oordeel, die pijn der hellen, ende die vreucht des Hemels. Ick vvilde vvel dat ghy hier principalijcken in vervaren waert, vvant hier hangt u salicheyt aen, die reste sal onse lieve Heer schicken dat ghy lichtelijck vercryghen sult. Want onse lieve Heer die seyt: soeckt eerst het rijcke Godts en zijn gherechticheydt, en 'tander sal u toegheworpen worden. Zijt hier mede den Heer bevolen en draecht u [...]n. |
|