aant.
Den Drucker wenscht allen goedwillighen Lesers ende Beminders der Vlaemscher ofte Nederduytscher ende Fransoyscher talen / in de zelue alle voorderinghe / verstand ende eeuwigh profijt.
NAER dien wy (beminde Leser) ouer langhen tijd ghehoort, verstaen ende alzo wel door tghetughe van vele, als door onzen eighen aerbeid ende experientie ghenough vernomen hebben ende te vollen verzekert zijn van den oorbore, profitelicheit ende groot gherieue van desen bouke. Bouen dien ooc, dat den eersten druk (by wilent Ioos Lambrecht binnen deser stede gheprentt) alreede van ouer veel jaren ghefailliert, niet vindelik ende zeer ghesocht is gheweest: zo zijn wy hendelinghe van den zinne gheworden om den zeluen wederomme te drucken ende int licht te bringhene. Eensdeels, op dat ghy daer door in beide de talen zoudt moghen beholpen ende ghevoordert wesen: ende ooc ten anderen, op dat den aerbeid ende eerste voortbringhen van den voornomden Autheur, niet teenemale [do]ot ende in een duyster ondankbaerheit en zoude begrauen bliuen, die hy ons zo goed[jon]stelicken ende zeer ghewillighlicken heeft laten ter bate commen, zo ic wel weet.
Dus dan (beminde Leser) int zelue voornemen voort ghevaren zijnde, zo en hebben wy [da]ertoe gheenen cost, ia onzen eighen aerbeid nocht ooc dien van onze goede vrienden [g]eensins ghespaert. bekennende dattet gheen werk en is van eens mans doen, zo v.L. ooc wel [gh]evroeden can: nocht ooc dat nemmermeer in zijn gheheele ofte volmaekt en magh worden, dan door de neerstigheit ende becommernisse int lesen, schryuen ende vlytigh opteekenen van veel studiëuse Gheesten, die ons ooc in desen haerlieder aerbeyd zeer mildelicken daertoe gheschoncken hebben. Dit zelfde zal v.L. wel bliken, als ghi d'aude copie teghen dese teghenwoordighe begheert te verlikene: want wy die (by middel alsbouen) van ontallike veel woorden ende vocablen, zeer ghemeerdert ende grooteliken vermenighfuldicht hebben. Biddende v.L. al tselue in danke te willen nemen ende de fauten goetwillichlicken te verdraghen (indien daer eenighe zijn) bedinkende