Doe bleefs in mich

[p. 38]

Ballade

Papa, parbleu, waar generaal:
Eine van den aauwe sjlaag.
Waat gauf ich aevel òm zie goud
En de sjtarren op ziene kraag?
'ne Generaal mit goud-galòng,
Mit saabel en sjakkoo.
Zien dochter heisjde Eusjenie, -
Eusjenieke zoo en zoo.

Me tròf zich irges op ne keer,
Me haauw direk zich gaer.
Veer kalden euver den aauwen tied
En euver 't duuster waer.
Me sjprouk geruird en gauf zich auch
Ei muulke hie en dao...
Mer 't koum gaauw oet, en de generaal
Waar dat zien eer te nao.

Hei 't kònne doere, dat gelök?
Papa waar generaal:
Hae vònj zien dochter vööl te flök*,
En mich vònj hae te kaal.
De saabel rammelde van geweld.
Pa sjloug mit handj en vout...
Es 'ch noe zoo eine taenge kòm,
Dan kaok mich nog mie bloud.

Ich dènk nog dèks aan die romance
Van saabel en sjakkoo, -
Want 'ch höb et toch mer gaer gehad,
Eusjenieke zoo en zoo.
Mer 't ging daomit wie 't geit mit al
Waat zuuver is en sjoon.
De welt-van-noe haet, erg genòg,
Gein romantiek van doon.