enich teyken van hem te siene. Herodes vraghede hem met vole redene, ende hi en antworde hem niet. Die princen der priesteren ende die scriben stonden stadelic ende wroegheden hem. Herodes versmade hem mit sinen ghesinde ende bespottene ende dede hem aen een wit cleet ende sandene weder tot Pylatum. Ende van dien daghe sijn si vriende gheworden, Herodes ende Pylatus, want te voeren waren si viande onderlinghe.
Pylatus riep te gader die princen der priesteren ende die meestersccap ende dat volc ende seyde tot hem: Ghi hebt mi desen mensche ghebrocht als enen verkeerre des volcs. Siet, ic heb hem voer u ghevraghet ende ic en vinde gheen zake in desen mensche van dien, daer ghi hem in wroeghet, noch Herodes oec, want ic hebben gheseynt tot hem ende siet, daer en is niet ghewroecht, dat der doet waerdich is. Daer um sal hiet beteren ende ic sal hem quijt laten. Nu moest hi hem alle feest daghe enen quijt laten. Doe riep alle die scare te gader ende seyde: Doet desen heen ende laet ons Barrabam! die um een verraderie die inder stat ghesciede ende um een manslacht inden kerker gheleyt was. Anderwerf sprac Pylatus tot hem ende woude Ihesum laten. Ende si riepen ende seyden: Cruest hem, cruusten! Ende hi seyde dorde werf tot hem: Wat hevet dese quades ghedaen? Ic en vinde gheen sake der doet in hem. Laeten mi daer um een correxie gheven ende quijt laten. Doe pijnden sijt mit groter stemmen ende begherden datmen hem cruusden, ende hoer stemmen worden gheweeldich. Ende Pylatus gaf vondenis hoer begherte te ghescien. Hi lieten hem quijt, die om die manslacht ende um die verradenis ghevanghen was inden kerker, dien si eyscheden, mer Ihesum leverden hi over tot horen wille.
Ende doe sine leyden, grepen si enen van den durpe comende, die Symon Sereneus hiete ende leyden hem sijn cruus op nae Ihesum te draghene. Een grote scare van volke ende van wiven volchden hem, welke vrouwen hem bescreyden ende beweenden. Doe keerde hem Ihesus umme tot dien ende seyde: Dochteren van Iherusalem, en wilt niet wenen op mi, mer weent op u selven ende op uwe kijnder, want siet, het sollen daghe comen, daer si in segghen sollen: Salich sijn die onvruchtbaren ende die buecke die niet ghewonnen en hebben ende die bursten die niet ghesoghet en hebben. Dan sollen si den berghen beghinnen te segghen: Vallet op ons, ende den hovelen: Bedect ons, want of si dit inden gruenen hout doen, wat sal inden dorren ghescien?
Ende het worden oec twe ander bose scalke mit hem gheleyt, dat mense verdoen soude.
Ende doe si quamen in een stede die Calvarie hiete, daer cruusten si hem ende die moerdeners, den enen ter rechter ziden ende den anderen ter luchter ziden. Doe seyde Ihesus: Vader, verghevet hem, want si en weten niet, wat si doen. Si deelden sijn cleder ende worpen lot. Ende dat volc stont ende verwachtene. Ende die princen bespotten mit hem ende seyden: Dese hevet ander lude behouden ghemaect, behoude hem selven, of hi Cristus, Godes ghemijnde, is! Ende die riddere quamen ende bespotten hem oec ende brochten hem edic ende seyden: Bistu der Joden coninc, soe maec di behouden! Ende een ghescrifte was ghescreven op hem mit Greexen litteren ende Latijnschen ende Ebreuschen: Dit is der Joden coninc.
Een vanden mordenaers die daer hinghen, blasphemierde in hem ende seyde: Bistu Cristus, soe maec di selven behouden ende ons! Die ander antworde ende berispedene ende seyde: Ende du en ontsieste Gode niet, dattu inder selver verdoemenis biste? Ende wij ummer te rechte, want wij ontfanghen recht loen van den werken, mer dese en hevet niet quaeds ghedaen. Ende hi seyde tot Ihesum: Heer, ghedencke mijns, als du comeste in dijn rike. Ende Ihesus seyde hem:
Auteursrechtelijk beschermd