Nieuwe testament (Noordnederlandse vertaling)

XXIV

Des irsten daghes vander weken des merghens seer vroe quamen si totten grave ende brochten die salve, die si bereyt hadden, ende vonden den stene umghewentelt vanden grave ende ghinghen in ende en vonden des Heren Ihesu licham niet. Ende het ghesciede, doe si met herten van onmacht verwondert waren van desen, dat twee manne in blinckenden clederen bi hem stonden. Mer doe si vreesden ende dat aensicht neder sloeghen inder eerden, doe seyden si tot hem: Wat soect ghi den levenden mitten doden? Hien is hier niet, mer hi is op ghestaen. Ghedencket, hoe hi u ghesproken hevet, doe hi noch mit u was in Galileam ende seyde, dat des menschen sone moet over ghelevert werden inder sonder hande ende ghecruust werden ende des dorden daghes verrisen. Ende si ghedachten sijnre woerde ende si ghinghen uut van den grave ende al dit boetscapten si den eelven ende alle den anderen. Het was Maria Magdalena ende Johanna ende Maria Jacobi ende anderen, die mit hem waren, die dit toe den apostolen seyden. Ende dese woerde scenen voer hem recht als ghecke rasinghe, ende en gheloefden hem niet. Mer Petrus stont op ende liep tot den grave ende knielde neder ende sach die linen laken alleen gheleghet ende ghinc heen ende in hem selven verwonderde hi dat daer ghesciet was.

Ende twee van hem ghinghen op den selven dach in een casteel, dat tseestich stadien was van Iherusalem ende hiete Emaus, ende si spraken onderlinghe van al dat daer ghesciet was. Ende het ghesciede, doe si calleden ende mit malcanderen vragheden, dat Ihesus selve daer bi quam ende ghinc mit hem. Mer hoer oghen waren ghebonden, dat si hem niet en keenden. Ende hi seyde tot hem: Wat sijn dese redene, die ghi onderlinghe spreect al wanderende ende sijt drovich? Ende een die Cleophas hiete, antworde hem ende seyde: Bistu alleen een peelgrim in Iherusalem ende en wetestu niet, wat daer in ghesciet is in desen daghen? Hi vraghede hem: Wat? Ende si seyden van Ihesu Nazareno, die een machtich propheet was inden werken ende inder leringhe voer Gode ende voer allen luden, ende hoe hem onse princen ende die overste priesteren over ghegheven hebben inder verdoemenissen der doet ende hebben hem ghecruust. Wij hadden ghehaept, dat hi Israhel verloset soude hebben. Ende

[fol. 50r]

nu boven al dit is huden die dorde dach, dat dese dinghe ghesciet sijn. Mer sommighe wive van ons hebben ons vervaert, die voer der dagheraet, dat is lichte, totten grave waren, ende doe si sijn lichame niet en vonden, quamen si ende seyden, dat si een visioen der enghele ghesien hadden, die seyden dat hi levet. Ende sommich van onsen ghinghen heen totten grave ende vondent alsoe alst die wivekens gheseyt hadden, mer hem vonden si niet. Ende hi seyde tot hem: O dwase ende traghe van herten te gheloven in allen dinghen die die propheten ghesproken hebben! En behoerde Cristum dit niet toe lidene ende alsoe in sine glorie te gaen? Ende hi began van Moyses ende van allen den propheten ende ontbant hem in allen scripturen die van hem ghescreven waren.

Ende si nakeden den casteele, daer si toe ghinghen, ende hi veensede hem vorder te gane, ende si dwonghenen mede ende seyden: Blijf mit ons, want het naket den avende ende die dach is te hans heen ghegaen. Ende hi ghinc mit hem in. Ende het ghesciede, doe hi mit hem was gaen sitten, nam hi dat broet ende benedidet ende bract ende gaeft hem, ende hoer oghen sijn open ghedaen ende si bekeenden hem, ende hi ontvoer van horen oghen. Doe seyden si onderlinghe: Was onse herte niet bernende in ons, doe hi mit ons sprac inden weghe ende oploec die scrifturen?

Ende si stonden in dier selver uren op ende ghinghen weder in Iherusalem ende vonden die elve ende die mit hem waren vergadert, ende seyden dat die Heer waerlic opghestaen waer ende hadde hem gheapenbaret Symon. Ende si vertelden dat daer inden weghe ghesciet was ende hoe sien bekenden inden breken des broedes.

Doe si dit spraken, stont Ihesus in die middel van hem ende seyde: Vrede si u, ic bint, en ontsiet u niet. Si waren bedroevet ende vervaert ende waenden enen gheest ghesien te hebben. Ende hi seyde hem: Waer toe sidi versaghet ende die ghedachten stighen op in uwen herten? Siet mine hande ende mine voete, want ict selve bin; tastet ende siet, want gheeste en hebben vleysche noch been als ghi mi siet hebben. Ende doe hi dat gheseghet hadde, toende hi hem hande ende voete. Doe si noch niet en gheloefden ende verwonderden van vrouden, seyde hi: Hebt ghi hier yet datmen eten sal? Doe brachten si hem een stucke ghebradens vissches ende een honich roete. Ende doe hi voer hem luden ghegheten hadde, nam hi dat relijf ende gaffet hem.

Ende hi seyde hem toe: Dit sijn die woerde die ic u seyde, doe ic nochtan mit u was, want het moet allet vervullet wesen, dat ghescreven is in Moyses wit van mi ende inden propheten ende inden psalmen. Doe loec hi hem op den sinne, dat si die scrifturen verstonden, ende hi seyde hem: Want alsoe eest ghescreven ende alsoe behoerde Cristum te liden ende des dorden daghes vander doot verrisen ende in allen luden ghepredict te werden penitencie in verlatenisse der sonden in sinen name, van Iherusalem te beghinnen. Ghi sijt ghetughe van desen. Ende ic sal die beloefte mijn vaders in u seynden. Mer sittet ghi inder stat, thent ghi der moghentheyt aen ghedaen wardet van boven.

Doe leyde hi se uyt buten Bethanien ende mit opgheboerden handen benedide hi se. Ende het ghesciede, doe hi se benedide, dat hi van hem sciet ende wart ghevoert inden hemel. Ende si aenbedene ende keerden weder in Iherusalem mit groter vrouden, ende si waren inden tempel, altoes Gode lovende ende benediende.