Nieuwe testament (Noordnederlandse vertaling)

XII

Ihesus quam sees daghe voer Paeschen te Bethanien, daer Lazarus doet was, dien Ihesus verweect hadde. Si maecten hem daer een aventmale ende Martha diende. Lazarus was een van dien die mit hem aten. Doe nam Maria van nardo pistico ghemaect een pont duerbaerre zalven ende salvede Ihesus voete ende droeghede Ihesus voete mit horen hare, ende dat huus is vervult vanden roeke diere zalven. Doe seyde Judas Scarioth die hem verradende was, een vanden jongheren: Waer um en is die zalve niet vercocht um driehondert penninghe ende den armen ghegheven? Dat seyde hi niet, dat tot hem vanden armen toebehoerde, mer want hi een dief was ende die budelen hadde, droech hi dat daer ghegheven wart. Doe seyde Ihesus: Laet hoer, dat si dat houde inden daghe mijnre begravinghen; die armen soldi altoes mit u hebben, mer mi en soldi altoes niet hebben.

Een grote scare vanden Joden wiste doe, dat hi daer was, ende quamen niet um Ihesum alleen, mer dat si Lazarum zien wouden, dien hi vander doot verweecte. Die princen der priesteren dochten dat si Lazarum souden verslaen, want vole vanden Joden ghinghen um sinen wil heen ende gheloefden in Ihesum.

Des anderen merghens, doe een grote scare, die ghecomen was totten feestdaghe, ghehoert hadden dat Ihesus te Iherusalem quam, namen si tellighe van palmbomen ende ghinghen hem te ghemoete ende riepen: Ozanna, dats: behout ons, ghebenediet is hi, die coemt inden name des Heren, coninc van Israhel!

Ende Ihesus vant een ezelken ende sat op hem, als ghescreven is: En wilt niet ontsien, dochter van Syon, sich, dijn coninc coemt di, sittende op eenre ezelinnen jonc.

Dit en keenden ten irsten sijn jongheren niet, mer doe Ihesus ghorificeeret wart, doe dochten si, dat dit van hem ghescreven was ende si hem dit ghedaen hadden. Die scare gaft tgetuuch, die mit hem was, doe hi Lazarum uut den grave riep ende vander doet verweecte. Daer um quam hem oec die scare te ghemoete, want si hoerden dat hi dat teyken ghedaen hadde. Doe seyden die Pharizeen tot hem zelven: Ghi siet dat wij niet en vorderen, siet, alle die werlt gaet nae hem hin.

Het waren sommighe heydene van dien die op gheclommen waren, op dat si beden souden inden feestdaghe. Dese ghinghen tot Philippum, die van Bethsayda was uut Galileen, ende baden hem ende seyden: Heer, wij willen Ihesum sien. Doe quam Philippus ende seydet Andriese, ende Andrieas noch Philippus en seydent Ihesum. Ihesus antworde hem ende seyde: Die ure coemt, dat die zone des menschen gheclarificeert sal werden. Voerwaer, voerwaer segghe ic u: Het en si, dat dat weyten coerne, dat in die eerde valt, stervet, het blivet selve alleen, mer eest dattet ghedoedt werdt, het brenghet voel vruchten. Die sijn ziele minnet, salse verliesen, ende die sijn ziel haet in die werlt, die besteetse in dat ewighe leven. Soe wie mi dient, die sal mi volghen ende daer ic bin, daer sal mijn dienre wesen. Soe wie mi dienen sal, dien sal mijn vader eeren. Nu is mijn ziele bedroeft of verstoeert, ende wat sal ic segghen? Vader, beholt mi van deser uren! Mer daer um bin ic in deser uren ghecomen. Vader, verclare dinen name! Doe quam een stemme vanden hemel: Ende ic hebben gheclarificeert ende ic sallen

[fol. 60r]

noch clarificeren! Die scare die daer stont ende dat hoerde, seyden dattet een donreslach ware. Sommich ander seyden: Die enghel Godes hevet hem toeghesproken. Ihesus antworde ende seyde: Dese stemme en quam um mi niet, mer um u. Nu is dat oerdel der werld, nu sal die prince der werlt uut gheworpen werden, ende eest dat ic verheven sal werden vander eerden, alle dinc sal ic tot mi trecken. Dat seyde hi, bewisende, wat dode hi sterven soude. Die scare antworde hem: Wij hebben ghehoert uter ee, dat Cristus eweliken blivet, ende hoe seghestu: Die zone des menschen moet verhaven werden? Wie is dese zone des menschen? Doe seyde hem Ihesus: Noch isser luttel lichts in u. Wandert die wile dat ghijt tlicht heebt, op dat u die duusternisse niet en bevanghen, ende die inder duusternisse wandert, en weet niet, waer hi wandert. Ghelovet in dat licht die wile, dat ghij dat licht hebbet, op dat ghi die kijnder des lichtes sijt.

Dit seyde Ihesus ende ghinc heen ende verberch hem van hem luden.

Doe hi alsoe vole teykene ghedaen hadde voer hem luden, en gheloefden si niet in hem, op dat Ysayas woert vervult worde, dat hi sprac: Heer, wie hevet onsen horen ghelovet ende dijns Heren arm is ontdect? Daer um en mochten si niet gheloven, want Ysayas noch seyde: Hi hevet hoer oghen verblijnt ende hoer herte verhaert, dat si mitten oghen niet en sien ende mitten herten niet en verstaen ende bekeert werden, dat icse ghesont maeke. Dit seyde Ysayas, doe hi sijn glorie sach ende van hem sprac. Nochtan vanden princen gheloefder vole in hem, mer um die Pharizeen en ghelieden sies niet, op dat si uter synagoghen niet gheworpen en worden, want si minden meer der menschen eer dan die eer Godes.

Ihesus riep ende seyde: Die in mi ghelovet, en ghelovet in mi niet, mer inden ghenen die mi gheseynt hevet, ende die mi siet, die siet den ghenen die mi gheseynt hevet. Ic, die dat licht bin, quam in die werlt, op dat soe wie in mi ghelovet, inder duusternisse niet en blive. Ende soe wie mine woerde hoert ende niet en behoedet, ic en oerdele hem niet; ic en bin niet ghecomen, dat ic die werlt veroerdelen sal, mer op dat ic die werlt behoude. Die mi versmaet ende mijn woerde niet en ontfanghet, hi heeften, die hem oerdelen sal. Dat woert dat ic ghesproken hebbe, dat sal hem oerdelen inden jonxsten daghe, want ic en heb van mi zelven niet ghesproken, mer die vader die mi seynde, hi gaf mi zelve een ghebot, wat ic spreken sal ende wat ic sal segghen. Ende ic weet dat sijn ghebot ewich leven is. Daer um dat ic spreke, dat spreke ic alsoe alst mi die vader gheseghet heeft.