Nieuwe testament (Noordnederlandse vertaling)

XI

Die apostelen ende die brueders die in Judeen waren, hoerden, dat die heyden oec dat woert Godes ontfanghen hadden ende eerden Goede den Here.

Ende doe Petrus te Iherusalem quam, twisteden si yeghens hem, die vytter besnidenisse waren, ende seyden: Waer om ghinghestu in tot den mannen die onbesneden sijn ende hebste mit hem ghegeten? Doe begonste Petrus hem te bedueden alser ghevaren was ende seyde: Ic was inder stat van Joppe bedende ende sach een visioen in den overtret des ghemoedes, een groet vat nederdalende als een linnen cleet, dat waert mit vier hoken neder ghelaten van den hemel ende dat quam tot my. Ende doe icker in sach, merkede ic, datter in waren viervoete diere der eerden ende beesten ende crupende dieren ende voghelen des hemels ende ic hoerde oec een stemme, die my seyde: Peter, stant op, slach doet ende et! Ende ic seyde: Here, in gheenre wijs, want in mynen mont en is nie ghemeen spise noch onreyne spise inghegaen. Doe antworde die stemme van den hemel ander werve: Dat God ghereynighet hevet sechstu dattet niet is. Ende dat is te driewerven ghesciet, ende alle die dinghe sijn weder in den hemel ghenamen. Ende siet, thans stonden daer drie manne in den huze, daer ic in was, die ghesent waren van Cesarien tot my. Doe seyde die gheest tot my dat ic mit hem ghinghe ende niet en twivelde. Ende dese ses brueders quamen mit my ende wy ghinghen in des mannes huys. Doe vertellede hy my, hoe hi den enghel in sijn huys hadde sien staende ende hem segghende: Sent in Joppen ende doe totti halen Simon, die Petrus toe ghenaemt is, hy sal dy woerde spreken, daer du ende al dijn huys in behoelden

[fol. 146r]

salste wesen. Doe ic began te spreken, viel die Hilghe Gheest op hem luden alsoe hi op ons dede inden beginne. Doe ghedochte ic des Heren woert, als hy seyde: Johannes heeft ju inden water ghedoept, mer ghy sult inden Hilghen Gheest ghedoept waerden. Daer om, of hem God die selve gracie gaf alsoe hy ons gaf, die inden Heren Ihesum Cristum gheloveden, wie was ic, diet den Here verbieden mochte? Doe si dit ghehoert hadden, sweghen si ende loveden Gode ende seyden: Soe heeft God oec den heydenen penitencie ghegheven totten leven.

Ende die ghene die verstroyet waren vander tribulacien die onder Stephano ghedaen was, die wanderden al doer tot Phenicen ende Ciprum ende Anthiochien toe ende en spraken nieman dat woert dan allene den Joden.

Ende somich van den verstroyden brueders waren vyt Cipres ende vyt Cyrenen. Doe si binnen Anthiochien ghegaen waren, spraken si totten Greken ende boetscapten den Here Ihesum, ende die hant Gods was mit hem ende een groet ghetal der ghelovigher is bekeert totten Here.

Doe quam die mare van desen totten oren der kerken die te Iherusalem was, ende si sendeden Barnabam tot Anthiochien. Ende doe hy ghecomen was ende die ghenade Gods ghesien hadde, waert hy verblijt ende troestedse alle toe mitten opsette des herten te bliven in den Here, want het was een guet man ende vol des Hilghen Gheests ende vol gheloven. Ende den Here is een groet scare toe gheset. Doe voer hy tot Tarsum, op dat hy Paulum solde soeken. Doe hiene ghevonden hadde, leyden hine tot Anthiochien ende daer bleven si een heel jaer onder die gheloevighen ende leerden een groete scare, alsoe dat si kerstine jonghere alre ierst tot Anthiochien ghenoemt worden.

In dien daghen quamen tot Anthiochien propheten van Iherusalem, ende een van hem, die Agabus hiette, stont op ende bewijsde overmids den Hilghen Gheest, datter een groet hongher in al die werlt toe comende ware, alst oec ghesciede onder den keyser Claudio. Ende die jongheren, na dat een yghelic hadde, nament op, dat [si] tenen onderstande in der noettorsten senden wolden den bruederen, die in Judeen woenden. Dat deden si oec ende sendent totten ouden brueders by Barnabe ende Pauwels handen.