in den kerker. Doe ghesciede tot Goede voer hem ghebedinghe sonder onderlaet vander kerken.
Ende doene Herodes voertbrenghen solde, in der selver nacht was petrus slapende tusschen tween ridders, mit tween ketenen ghebonden, ende die wachters hoededen den kerker voer der doren. Ende sich, die enghel Gods stont by Petrum ende dat licht scheen claer in dier woninghe ende hi sloech an petrus side ende verweckeden ende seyde: Stant op haestelic! Ende die ketene vielen van sinen handen. Ende die enghel seyde tot hem: Gorde dy ende doe an dijn cousen ende dijn schoen. Ende hy dede alsoe. Ende de enghel seyde hem: Doe dy dyn cleet omme ende volch my. Ende al vyt gaende volchde hy hem na ende en wiste niet, dattet waer was, dat overmids den enghel gheschiede, hy waende een visioen ghesien hebben. Doe ghinghen si doer die ierste ende doer die ander wake ende quamen totter yseren poerte, die totter stat leydet, die hem voert open ghedaen is. Ende al [uut] gaende ghinghen si doer een steghe ende thans schiet die enghel van hem. Ende Petrus quam weder tot hem selven ende seyde: Nu weet ic waerlic dat die Here sinen enghel ghesent hevet ende my verlosset heeft vyt Herodes handen ende van alre wachtinghe des volcs der Joden. Ende hy naems waer ende quam totten huse Marien der Johannis, die Marcus toe ghenaemt is, daerre voel vergadert waren ende beden. Doe hy den inganc der doren cloppede, quam een jonc wijf voert om te besien, die Rode ghenoemt was. Ende doe si Petrus stemme kennede, en dede si die dore van blijscappe niet op, mer si liep in ende boetscapte dat Petrus voer die dore stonde. Doe seyden si tot haer: Du raseste. Ende si seyde dattet ommer alsoe ware. Ende si seyden: Het is sijn enghel. Ende Petrus bleef staen cloppende. Doe si op ghelaken hadden, saghen si hem ende verwonderden. Doe wijsde hy hem mitter hant, dat si swighen solden ende hy vertellede hem, hoe datten die Here vytten kerker gheleydet hadde ende seyde: Kondighet dese dinghe Jacob ende den brueders. Ende hy ghinc vyt ende ghinc en wech in een ander stede.
Doet dach was, en wasser gheen cleyn verstueringhe of versaechtheyt onder die ridders, wat daer van Petro ghesciet mochte wesen.
Doene Herodes ghesocht hadde ende niet ghevonden, ende doe daer een ondersoec ghedaen was van den wachters, gheboet hi dat men se tot hem brochte. Ende hy vuer neder vyt Judeen in Casaream ende woende daer.
Want hy was erre op die van Tirien ende van Sydonien. Ende si quamen eendrachtelich tot hem ende versondeden enen, hiet Blastus, die des conincs camerlinc was, ende begheerden dat hy hem vrede verworve, want si en mochten sijns toerns niet ghewesen om dat haer lande van hem ghevoedet moeste werden. Des besciet hem die coninch enen dach
Auteursrechtelijk beschermd