het was te Listris een man ziec inden voeten ende sat cropel, die nie ghewandert en hadde van dat hy gheboren was. Dese hoerde Paulum spreken. Paulus sach en aen ende merkede dat hijt tgheloeve hadde ghesont te waerden, ende sprac mit luder stemmen: Stant recht op over dine voete! Ende hy spranc op ende wanderde. Doe die scaren ghesien hadden dat Paulus dede, hieven si haer stemmen op na der talen van den lande van Liconien ende seyden: Tot ons sijn gode neder ghecomen, die ghelike menschen sijn. Ende si noemden Barnabam Jovem ende Paulum Mercurium te wesen, want hy wast, die twoert voerde. Ende die papen des afgods Jovis, die voer die stat was, brochte mit hem ossen ende cronen voer die dore [daer] die apostelen in waren ende wolden hem mitten volke sacrificie doen. Doe Barnabas ende Paulus, die apostelen, dat daer hoerden, scoerden si haer rocken ende spronghen in die scaren ende riepen ende seyden: Ghi manne, wat doe ghi? Wy sijn oec ghelike ju sterflike menschen ende boetscappen ju, dat ghi van desen ydeliken dinghen ghekiert wert totten levenden Goede, die hemel ende eerde regiert ende dat mer ende alle dinghe die daer in sijn, ghemaket hevet, die in voerledene gheslachte alle heydene heeft laten in gaen in haren weghen ende dat niet sonder ghetughe. Hi hevet hem selven weldoende ghelaten ende ghaf hem reghen van den hemele ende vervullede die vruchtbare tide mit spisen ende juwe herten mit blijscappen. Ende dese dinghe segghende mochten si die scare cume bestouwen, dat si hem niet en offerden.
Doe quamen daer somighe Joden van Anthiochia ende Yconia ende rieden die scare daer toe, dat si Paulum steenden ende toghen buten der stat ende waenden, dat hi doet gheweest hadde. Doe sijn jongheren omtrent hem quamen staende, stont hy op ende ghinc inder stat. Ende des anderen daghes voer hy mit Barnaba in Derben.
Doe si dier stede ghepredict hadden ende haerre veel gheleert hadden, kierden si tot Listren ende tot Yconien ende te Anthiochien ende vestichden die zielen der jonghers ende troestense, dat si inden ghelove volduren solden ende dat ons overmids veel droefnissen behoert in dat rike der hemele te gaen. Ende doe si hem priesters gheset hadden in allen steden ende haer bedinghe ghedaen hadden mit vasten, bevalen si [se] den Here, daer si in gheloveden. Ende al lidende doer Psidiam quamen si in Pamphilien ende spraken des Heren woert in Perghen; si daelden neder in Natalien ende quamen van dan te scepe tot Anthiochien, van waen si der gracien Gods ghegheven waren in den werke, dat si vervullet hadden. Doe si ghecomen waren ende die kerke vergadert hadden, vertelleden sie, hoe vele God mit hem ghewrocht hadde, want hy den heydenen die dore des gheloves op ghedaen hadde. Ende een langhe tijt woenden si mitten jongheren
Auteursrechtelijk beschermd