Nieuwe testament (Noordnederlandse vertaling)

XX

Ende doe die onruste gheleden was, riep Paulus die jongheren ende troestedse ende hi bevalse onsen Here, ende voer voert ende ghinc in Macedonien. Ende doe hijt lant doer wanderde ende hi se mit veel leringhe ghetroest hadde, quam hi tot Grieken. Doe hi daer drie maende gheweest hadde ende hi in Sirien te scepe varen solde, worden hem laghen gheleyt van den Joden. Doe bereet hi hem, dat hi weder keerde doer Macedonien, ende mit hem voer Socipater Pirri van Beroen gheboren ende Aristarcus ende Secundus ende Gayus ende Derbeus [ende Thymotheus], dese waren van Tessalonen

[fol. 154r]

gheboren, ende vyt Asien volgede hem na Ticicus ende Trophinus. Doe dese voer ghevaren waren, beyden si ons tot Troaden. Ende na der feesten van Paschen voren wi te scepe van Philippis ende quamen in vijf daghen te Troada tot hem luden, ende daer bleven wy zeven daghe.

Ende op een van den sabbaten, doe wy te gader ghecomen waren om tbroet te breken, doe predikede Paulus ende want hi des anderen daghes varen solde, vertoech hijt sermoen al totter midder nacht toe. Ende inder camer, daer wy in vergadert waren, daer waren veel lampeden. Nu satter een jonghelinc opt venster ende hiete Eutiticus, ende want Paulus sijn sermoen lanc makede, soe waert die joncghelinc vakende, ende hi waert onslape ende viel vanden derden solre ter eerden, ende men hief hem op ende vantten doet wesen. Doe Paulus tot hem neder gheclommen was, ghinc hy op hem ligghen ende nammen in sinen arm ende seyde: En wil niet versaghet wesen, want sijn siel is in hem. Ende doe clam hi op ende brac tbroet ende at ende predikede hem totten daghe toe, ende alsoe voer hi en wech ende si brochten Euthicum, den jonghelinc, levende voer hem ende sijn seer wal ghetroestet.

Wi ghinghen te scepe ende voren in Assonem ende wy verbeydeden Paulum daer, want alsoe hadde hi hem beraden, dat hi te lande solde ghaen. Ende doe hi ons in Asson ghevonden hadde, name wine mit ons ende quamen tot Militenen. Ende des anderen daghes voren wy van dan te scepe ende quamen in Contractium, ende des daghes daer na quamen wy an te Samum ende des anderen daghes quamen wi tot Miletum. Want Paulus hadde voer, dat hi Ephesum voer bi wolde varen, op dat hi in Asia niet en merrede, want hi haestede om te Pinxteren te Iherusalem te wesen, oft hem hadde moghen geschien.

Doe Paulus tot Milentem was, ontboet hi tot hem die hogheste van gheboerten vyt der kerken van Ephesum. Doe si quamen ende altegader waren, seyde hi tot hem: Ghi weet wal, hoe ic van den yrsten daghe, dat ic in Asyen quam, mit ju gheweest hebbe alle tijt vyt, den Here dienende mit alre oetmodicheyt ende in tranen ende in becoringhen, die my toe ghecomen sijn van der Joden laghen, ende hoe ic nochtan daer om ju niet onthoghen en hebbe, dat ju nutte was, ic en hebbe ju gheprediket ende openbaerlic gheleert ende bi den huzen den Joden ende den heydenen ghetughet, in Gode penitencie te doen ende in onsen Here Ihesum Cristum ghelove te hebben. Ende siet, nu bin ic in den Gheeste ghebonden ende ga te Iherusalem, ende wat my daer ghescien sal, en weet ic niet, dan dat my die Hilghe Gheest in allen steden ghetughet ende seyt, dat myn vanghenisse ende mijn tribulacien my

[fol. 154v]

te Iherusalem ghehoelden sijn. Mer van alle desen en ontsie ic niet noch ic en make mijn leven niet costeliker dan my selven, op dat ic minen loep volbrenghe ende den dienst vol doe, die ic van den Here Ihesu ontfanghen hebbe, te betughen die ewangelie der gracie Gods. Ende siet, nu weet ic, dat ghi alle voert meer mijn aensicht niet sien en suelt, daer ic doer gheleden bin ende dat rike Gods ghepredict hebbe. Daer om neem ics ju allen huden op desen dach te ghetughe, dat ic reyn bin van juwer alre bloet, want ic en verbarch my niet, dat ic ju allen den raet Gods yet te myn ghekondighet hebbe. Siet toe voer ju ende voer alt cudde, daer ju die Hilghe Gheest biscoppen in ghesettet hevet, die kerke Gods te regiren, die hi mit sinen blode vercreghen heeft. Ic weet, dat na mynen heen sceyden gripende wolve [onder ju] sullen in comen, die den cudde niet sparen en sullen, ende uyt ju selve sullen manne op staen, verkierde leringhe sprekende, op dat si jongheren na hem verleyden moghen. Daer omme waket ende hoeldet inder ghedenckenisse, want ic vakende drie jaer al omme niet en hebbe gherust een ygheliken van ju mit tranen vermanende. Ende nu bevele ic ju Gode ende den woerde sijnre ghenaden, dies machtich is te stichten ende allen gheheylicden dat erve te gheven. Ghi wetet wal, dat ic ny mans zulver noch golt noch cleder begeert en hebbe, want tot dien dinghen, die my ende desen, die mit my sijn, noetdrocftich waren, hebben dese hande ghedient. Alle dinghe heb ic ju ghewiset, want alsoe arbeydende moet men die cranke brueders ontfanghen ende ghedencken des Heren Ihesus Cristus woerts, want hi seyde: Te gheven is meer saligher dan te nemen. Ende doe hi dat gheseyt hadde, viel hi op sinen knien mit allen den ghenen ende bedede. Doe waert daer een grote weninghe van hem allen ende henghen Paulum om den hals ende cusseden, ende droveden alte zeer in dien woerde, dat hi gheseyt hadde, dat si sijn aensicht niet meer sien en solden, ende dus leyden sine totten scepe.