Timbre de Cardone

1. Handelinghe, 2. wtcomst.

FENICIE, FAVSTINA, GIRONDE.

fen.

VVilt Dorithea hier te comen voort gebieden.

fav.

Het gheen mijn Vrou begeert sal inder yl gheschieden.

fen.

Tervvijl de gulde Son in sijn deurvvrocht Palleys
Ontbint sijn gulde pruyck tot ciersel van sijn reys,
Sijn paerden tvvemaeltvve spant voor sijn gulden vvagen,

[fol. A2v]

 

Om so sijn groote glans dvvars door de locht te dragen

 

VVijl 'tcorts-gevallen dau, vveer na de vvolcken rijst

 

En Ops haer groene cleedt Saturni Vader vvijst,

 

So lust mijn Ieughdich hert, geprickelt door een yver

 

Te treden hier in 'tgroen omtrent mijns vaders vyver

 

Nu ist den rechten tijt, dat met een soet ghequeel

 

Der vog'len vlugh ghesvvarm haer minnelietjens te[el]

 

Nu sietmen dat sy vast uyt haere nesten bruyssen

 

En d'onghebaende lucht met vleughelen becruyssen,

 

Nu sietmen dat 'tgediert vast uyt hun slaep ontvvaeckt

 

En yeder na sijn aert sich vreughdich hier vermaeckt

 

Men siet de vog'len dan op boomkens tirelieren,

 

Dan hipp'len over 'tvelt, dan om de vvolcken svvieren

 

En groeten met gesangh Tithonis vvaerde Bruyt,

 

Die voor de blonde Son de poorten open sluyt

 

gir.

 

Besitster van mijn ziel, ô Spiegel van mijn vvegen

 

Den Hemel die bedau u met syn rijcken zeghen

 

Hoe nu? mijn schoone Son, mijn leven, mijn genucht

 

Mijn licht, mijn troost, mijn heyl, hoe neemt ghy dus de vlucht,

 

Ach vvilt my doch de glans van u ghesicht niet nemen

 

Of mijn benaude ziel sal van dit rif vervremen

 

fen.

 

'k Gis dat u Ioncker zijn de zeden onbekent

 

Die men hier in dit lant te houden is ghevvent,

[fol. A3r]

 

gir.

 

VVat zijn de zeden dan?

 

fen.

 

Mans moghen nau aenschouvven

 

Veel minder houden spraeck met eerlievende vrouvven

 

Dies vvilden ick niet om Cicilien uyt den gront

 

Dat yemant, 'tzy, vvie 'tzy, my by u staende vont,

 

Dus gunt my mijn vertreck.

 

gir.

 

Ach Liefken! can, om reden,

 

fen.

 

Ghy zijt nu hier in 'tlant, dus voegt u na de zeden.

 

gir.

 

Gunt my dan dat ic eerst kus u snee-vvitte hant.

 

fen.

 

Ic hoop niet dat ghy zijt behulpen met mijn schant,

 

Ick bid u laet mijn gaen.

 

gir.

 

VVel moet het dan so zijn,

 

Adieu mijn lieve Lief, denckt dan somvvijl om mijn

 

Daer gaet mijn Engel heen, d'hertader van mijn leven,

 

VVat sal ick nu bestaen? Ick vvil my gaen gegheven

 

Recht naer Castilien toe, en sien of ick de min

 

Can roeyen uyt mijn hert als ick niet by haer bin.